注:客家话表音方块字舒声按调型读,入声仅区分高低,有带点和不带点两调号。此文中带点的为降调(ˋ ),不带点为平调。
四季,行入草山(邱一帆)
xi gui hangˇ ngib coˋ sanˊ
,
行入草山
hangˇ ngib coˋ sanˊ
杜鵑山櫻花花開
tu gienˊ sanˊ inˊ faˊ faˊ koiˊ
開出這一季
koiˊ cudˋ iaˋ idˋ gui
靚靚靚个身影
jiangˊ jiangˊ jiangˊ ge siinˊ iangˋ
毋知好煩勞
mˇ diˊ hoˋ fanˇ loˇ
都市
duˊ sii
屙屙糟糟个色目
oˇ oˇ zoˊ zoˊ ge sedˋ mugˋ
行入草山
hangˇ ngib coˋ sanˊ
竹雞阿鵲聲聲啼
zugˋ geˊ aˊ xiagˋ sangˊ sangˊ taiˇ
啼出這一季
taiˇ cudˋ iaˋ idˋ gui
鬧煎煎仔个聲響
nau jienˊ jienˊ eˋ ge sangˊ hiongˋ
毋使來愁慮
mˇ siiˋ loiˇ seuˊ li
都市
duˊ sii
恬肅肅仔个風景
diamˊ sogˋ sogˋ eˋ ge fungˊ ginˋ
行入草山
hangˇ ngib coˋ sanˊ
楓香芒花枝枝搖
punˊ hiongˊ miongˇ faˊ giˊ giˊ ieuˇ
搖出這一季
ieuˇ cudˋ iaˋ idˋ gui
活跳跳仔个影像
fad tiau tiau eˋ ge iangˋ xiong
毋使來掛吊
mˇ siiˋ loiˇ gua diau
都市
duˇ sii
暮固暮固个生活
mug gu mug gu ge senˊ fad
行入草山
hangˇ ngib coˋ sanˊ
硫磺地熱孔孔出
luiˇ fongˇ ti ngied kungˋ kungˋ cudˋ
孔出這一季
kungˋ cudˋ iaˋ idˋ gui
燒暖燒暖个味緒
seuˊ nonˊ seuˊ nonˊ ge mi xi
毋知好著驚
mˇ diˊ hoˋ cog giangˊ
都市
duˊ sii
冷雪雪仔个人情
langˊ xiedˋ xiedˋ eˋ ge nginˇ qinˇ
行入草山
hangˇ ngib coˋ sanˊ
草山,行入都市个心肝頭
coˋ sanˊ, hangˇ ngib duˊ sii ge ximˊ gonˊ teuˇ
,
行入草山
hangˇ ngib coˋ sanˊ
自然,行入每一儕人个心肝頭
cii ienˇ, hangˇ ngib miˊ idˋ saˇ nginˇ ge ximˊ gonˊ teuˇ
,
添加新评论